ОХОХ

Кæлæнгæнæг лæг, цæры обауы бын. Мæгуыр лæг æм хæрæгуаргъ хорыл афæдзы æмгъуыдмæ ныууагъта йæ фырты. Афæдзæй-афæдзмæ йæ Охох фæцахуыр кодта обауы бын. Уый афтæ сахуыр, æмæ-иу æй куы бафæндыдаид, уæд фестадаид алы сырд, алы фос, алы маргъ, алы дзаума. Иудзырдæй алцыдæр. Афæдзы фæстæ йæм йæ фыд кæнынмæ æрцыд æмæ, зæгъгæ, лæппуйæн йæхи æххуыс нæ уыд, уæд æй фыд ницæйтыххæй базыдтаид, афтæ аивта, ноджы ма йæ Охох æрлæууын кодта хуызæй кæрæдзи цæрмыстыгъд кæимæ бакодта, ахæм лæппуимæ. Охохимæ та афтæ дзырдгонд уыдысты куы нæ йæ базонай, уæд лæппу мæнæн баззайдзæн, зæгъгæ.

Охох мæгуыр лæджы фыртæн йæ ми нæ ныббарста. Лæппу йæ дæсныйадæй архайын куы райдыдта, уæд иуахæмы йæхи бæх фестын кодта, фыд æй уæйкæнынмæ аласта, Охох æй базыдта æмæ йæ балхæдта. Æз дын цы хъæуы, уый базонын кæндзынæн, куыйты хæринагмæ дæ æртæрдзынæн, зæгъгæ, йыл кусын райдыдта. Раууатмæ æрцыди бæх: йæ царм йе сджытыл ныххус, рагъ ын рагъæн нал бæззыд, барц-барцæн, къæдзил-къæдзилæн. Æмæ иуахæмы раирвæзт бæх Охохы хæдзарæй. Лидзы æфхæрд бæх, фæсте йæ суры Охох. Куы йæм æрбахæстæг, уæд бæх рувас фестад, Охох та – егар. Суры, суры рувасы æмæ йæм ныр фæлæбура, афтæ рувас бæлон фестад. Охох цъиусур фестади æмæ бæлоны уæгъд нал уадзы. Бахæццæ сты иу хъæумæ. Бæлон гом рудзынгыл хæдзармæ батахт æмæ зæхмæ фæткъуыйæ æрхауд. Охох чысыл лæппу фестад. Аныр фæткъуымæ фæлæбура, афтæ фæткъуы судзин фестад. Охох та – судзины фæдзæл. Судзин арты смидæг, фæдзæлы йæ фæдыл баласта, æмæ фæдзæл арты басыгъд. Судзин артæй рахызти, лæппу фестади æмæ сæхимæ æрфардæг.

кæс «АРВЫ ДУАР»-Ы СÆРГÆНДТÆ